Çavdêriya Mafên Mirovan a Sûriyê ragihand ku li bajarokê El-Nu’ayme li gundewarê Derayê di navbera endamên eşîrên El-Ebûd û El-Mehemîd de pevçûnên eşîrî derketine. Di şer de çekên makîneyî û çekên tûj hatine bikaranîn, di encamê de kesek birîndar bûye.
Sedemên pevçûnê hîn jî nayên zanîn. Ev yek di demekê de ye ku li deverên cuda yên parêzgeha Derayê rêze bûyerên ewlehiyê û pevçûnên herêmî çêdibin, ku ji ber nakokiyên malbatî û eşîrî û belavbûna çekan derdikevin holê.
Çend roj berê, Tariq Ziyad El-Miqdad, xortekî ji bajarokê Xesm li gundewarê rojhilatê Derayê, di gulebaranê de li nêzî mala xwe hat kuştin. Ew gelek birînên guleyan wergirt û mir.
Ev bûyer beşek ji rêze pevçûnên malbatî û eşîrî ye ku li deverên cuda yên Sûriyê diqewimin, di nav aloziyên ewlehiyê yên berdewam û hebûna berfireh a çekan li derveyî kontrola saziyên fermî yên dewletê de.
Li gorî Çavdêriya Mafên Mirovan a Sûriyeyê, ji destpêka sala 2026an vir ve li deverên ku di bin kontrola Hikûmeta Demkî ya Sûriyeyê de ne, nêzîkî 76 pevçûnên malbatî û eşîrî çêbûne, ku di encamê de 62 kes mirine û 130 kes birîndar bûne, di nav wan de du jin hene.
Tenê li parêzgeha Derayê di heman heyamê de 11 pevçûnên eşîrî hatine tomar kirin, ku di encamê de 3 kes mirine û 19 kes birîndar bûne.
