Home / NÛÇE / Hilweşandina Mizgefta Mîrekan a dîrokî, pirsan derbarê çarenûsa gorên 14 Mîrên Botanê de vedike

Hilweşandina Mizgefta Mîrekan a dîrokî, pirsan derbarê çarenûsa gorên 14 Mîrên Botanê de vedike

Mizgefta Mîrekan a dîrokî, ku yek ji şûnwarên girîng ên serdema Mîrektiya Botanê ye, li bajarê Cizîrê yê parêzgeha Şirnexê, Bakurê Kurdistanê, tê hilweşandin. Li gorî projeya nû, dê li şûna wê komplekseke nû bi navê “Kulliyeya Cemal Kadooglu” bê avakirin.

Ev proje, bi taybetî ji ber ku parastina navê dîrokî yê mizgeftê û ji nû ve avakirina tirbeyên 14 Mîrên Botanê di plansaziya wê de cih nagirin, nîqaşan derbarê parastina mîrateya dîrokî ya Kurdî de zêde kiriye.

Mizgefta Mîrekan, ku di tomarên fermî de bi navê “Mizgefta Meydanê” jî tê naskirin, bi dîroka Mîrektiya Botanê ve girêdayî ye. Cizîr di wê serdemê de navenda Mîrektiyê bû û gorên 14 ji Mîrên Botanê li kêleka vê mizgeftê bûn. Ji ber vê yekê, ev cih ji aliyê dîrokî û çandî ve xwedî girîngiyeke taybet e.

Li gorî agahiyên belavbûyî, gorên 14 Mîran di sala 1970an de, bi hinceta firehkirina hewşa mizgeftê, ji cihê xwe hatin rakirin û li qeraxa Çemê Dîcleyê ji nû ve hatin veşartin. Lê di projeya nû de ji bo ji nû ve avakirina tirbeyên wan pêşniyarek nehatiye kirin.

Li gorî agahiyên dîrokî, di serdema Mîrektiya Botanê de bi giştî 33 Mîrên Kurd hukum kirine û Cizîr navenda siyasî û îdarî ya wê bûye. Ev dîrok girîngiya parastina şûnwarên girêdayî wê serdemê, wekî beşek ji mîrateya dîrokî ya Kurdan, zêdetir dike.

Ji aliyê xwe ve, Kadooglu Holdingê ragihandiye ku bi Birêvebiriya Herêmî ya Weqfan a Cizîrê re protokolek îmze kiriye da ku projeya “Kulliyeya Cemal Kadooglu” pêk bîne. Li gorî daxuyaniya şirketê, komplekseya nû dê mizgefteke nû, kurseke Quranê û maleke şînê dihewîne û armanca wê pêşkêşkirina xizmetên olî û civakî ji bo gelê herêmê ye.

Merasîma îmzekirina protokolê bi beşdariya Qaymeqamê Cizîrê Ahmet Vezir Baycar, Birêvebirê Herêmî yê Weqfan Ali Osman Ayan û Alîkarê Serokê Desteya Birêvebir a Kadooglu Holdingê Celal Kadooglu pêk hatiye.

Di daxuyaniya şirketê de, tevî danasîna projeyê, behsa parastina navê dîrokî yê Mizgefta Mîrekan û ji nû ve avakirina tirbeyên 14 Mîrên Botanê nehatiye kirin.

Ev yek nîqaşa li ser pêwîstiya parastina mîrateya dîrokî û çandî ya Botanê careke din dixe rojevê. Mîrateyek ku ne tenê ji avahî û şûnwarên dîrokî pêk tê, lê dîroka Mîrektiya Botanê, bîra Mîrên wê û beşek girîng ji nasnameya çandî ya Kurdan jî dihewîne.