Washington piştî nakokiyên li ser Ukranya, civîna Budabestê di navbera Trump û Putin de betal kir
Rojnameya Financial Times ragihand ku Dewletên Yekbûyî yên Amerîka civîna plankirî ya li Budabestê ya di navbera Serokê Dewletên Yekbûyî yên Amerîka Donald Trump û Serokê Rûsya Vladimir Putin de betal kir, piştî ku Moskow tawîzên daxwazên xwe yên derbarê Ukraniya de red kir.
Rojnameyê diyar kir ku biryara Amerîka piştî peywendiyeke telefonî ya aloz di navbera Wezîrê Derve yê Rûsya Sergey Lavrov û hevtayê wî yê Amerîkî Marco Rubio de hat, di dema wê de Rubio Serok Trump agahdar kir ku Moskow “ti amadehiyeke rastîn ji bo danûstandinê nîşan nade”.
Li gorî raporê, Moskow daxwazên xwe parast, ku “tawîzên din di axên Ukraniya” wekî şertek ji bo agirbestê, li gel “kêmkirina girîng a hêzên çekdar ên Ukraniya” û garantiyên ku Kîev dê tevlî NATO nebe, dihewîne.
Rojnameya Financial Times zêde kir ku Wezareta Derve ya Rûsya noteyek fermî ji Washingtonê re şandiye û van daxwazan dubare kiriye, û wan ji bo çareserkirina tiştê ku Serok Putin wekî “sedemên bingehîn” ên pevçûnê bi nav kirî girîng dibîne. Ji aliyê xwe ve, Serokê Ukraniya Volodymyr Zelensky piştrast kir ku welatê wî “ji bo danûstandinên aştiyê amade ye”, lê tekez kir ku Ukraniya dê hêzên xwe ji ti axa din a ku niha kontrol dike venekişîne.
Trump berê piştgiriya xwe ji bo agirbestek li ser bingeha sînorên heyî nîşan dabû, lê paşê zelal kir ku ew “danûstandinên bêwate” bi Moskowê re naxwaze ku dê “windakirina demê” be.
Di heman demê de, Wezîrê Derve yê Macaristanê Péter Szijjártó diyar kir ku amadekariyên ji bo civîna Budabestê hîn jî didomin, û di tweetekê de zêde kir ku “Dewletên Yekbûyî di niyeta xwe ya lidarxistina civîna aştiyê de neşikestiye”, ku nîşan dide ku nîqaş hîn jî tenê li ser dema guncaw disekine.
Ev pêşketin di demekê de tên ku zexta dîplomatîk a li ser Moskowê piştî ragihandina cezayên nû ji hêla Washingtonê ve zêde dibe, û di demekê de ku Ewropî bangên ji bo ji nû ve destpêkirina danûstandinan ji bo bidawîkirina şerê ku ji sê salan zêdetir berdewam dike, zêde dibe.
