Eşîra El-Mewalî, bi rêya Encûmena Şûra ya eşîra El-Başakem, giliyek fermî ji Hikûmeta Demkî ya Sûriyê re pêşkêş kir û Fadî El-Casêm bi desteserkirina erda çandiniyê yê yek ji endamên eşîrê li gundewarê rojhilatê Hemayê tawanbar kir. Ev yek di demekê de tê ku ji ber nakokiyê li herêmê alozî zêde dibin.
Li gorî giliyê, erdê nakokî li bajarokê Ebû El-Qedûr, li navçeya El-Hemra ye û bi qasî 650 donim erdê çandiniyê vedihewîne. Eşîrê diyar kir ku desteserkirin bi karanîna makîne û kesên çekdar ên ku tê bawerkirin ku bi rêxistineke leşkerî ya di bin Hikûmeta Demkî de ve girêdayî ne, hatiye kirin.
Çavkaniyan zêde kirin ku erd bi buldozer û bi zorê hatiye hilweşandin, ku eşîrê ev yek wekî “binpêkirina eşkere ya mafên milkê taybet” û karanîna neqanûnî ya hêza leşkerî di karûbarên sivîl ên bi xwezaya milkê de nirxand. Eşîra El-Mewalî bûyer wek gefek rasterast li ser aştiya sivîla herêmê dît, û hişyarî da li ser encamên binpêkirinên berdewam, ku dikarin bibin sedema aloziyên civakî di navbera eşîrên li gundewarê Hemayê de.
Eşîrê daxwaz kir ku rayedarên têkildar lêpirsînek bilez û zelal li ser şert û mercên dozê vekin, kesên têkildar berpirsiyar bigirin, mafên xwediyên wan ên rastîn vegerînin û pêşî li dubarebûna van binpêkirinan bigirin.
Hêjayî gotinê ye ku Wezareta Xezîneyê ya Dewletên Yekbûyî di Tebaxa 2023an de li ser Lîwaya Silêman Şah û fermandarê wê yê berê, Mihemed el-Casêm, ku bi navê Ebû Emşa tê nasîn, li ser bingeha tewanbarên kirina binpêkirin û sûcên şer li çend herêmên Sûriyê, di nav de Efrîn û gundewarê wê yê derdorê, ceza danî.
