Wezîrê Derve yê Alman li Şamê Hevkariya Dualî û Pirsgirêkên Herêmî Dinirxîne
Di civîneke çapemeniyê de ku li paytexta Sûriyê Şamê hate lidarxistin, Wezîrê Derve yê Alman Johannes Wadephul banga hesabpirsînê li ser kesên ku di salên dawî de li herêmên Beravê û Siwêda bûne, kir. Wî tekez kir ku bidestxistina edalet û hesabpirsînê ji bo avakirina Sûriyeke nû û aram bingehîn e.
Wadephul diyar kir ku welatê wî bawer dike ku “pêşîgirtina li dubarebûna sûcên wiha gaveke pêwîst e ji bo xurtkirina baweriyê di navbera Sûriyan de”, û destnîşan kir ku Almanya bi tirs pêşketinên li wan deveran dişopîne.
Wezîrê Alman her wiha girîngiya têkoşîna li dijî terorîzm û bazirganiya madeyên hişber, û sînordarkirina her çalakiyek ku aramiya Sûriyê û herêmê tehdît dike, tekez kir, û ji Şamê xwest ku bi awayekî çalak beşdarî van hewldanan bibe.
Wadephul diyar kir ku welatê wî 13 milyon euro ji bo piştgiriya hewldanên mirovî li Sûriyê peyda kiriye, û hêviya Berlînê anî ziman ku di pêşerojeke nêzîk de balyozxaneya xwe li Şamê ji nû ve veke. Derbarê hilbijartinên parlemanî yên dawî li Sûriyê de, wezîrê Alman got ku ew “gaveke erênî ber bi pêvajoya siyasî ve” bûn, lê zêde kir ku “beşdarbûna parêzgehên Hesekê, Reqa û Siwêda dê pêbawerî û nûnertiya neteweyî ya mezintir bidaya wan.”
Wadephul piştgiriya welatê xwe ji bo yekparçeyiya axa Sûriyê piştrast kir, û destnîşan kir ku Almanya hewl dide ku hevkariya aborî û siyasî bi Sûriya “nû” re li ser bingeha edalet û hevkariyek hevseng xurt bike.
Wezareta Derve ya Sûriyê di daxuyaniyek çapemeniyê de diyar kir ku Wezîrê Derve yê Alman Johannes Wadephul bi serokê hikûmeta veguhêz ya Sûriyê, Ehmed El-Şer’i re civiya, ku her du aliyan li ser hevkariya aborî û siyasî, û her wiha hejmarek mijarên herêmî û ewlehiyê yên berjewendiya hevbeş nîqaş kirin.
