El-Şer’i ji bo beşdarbûna konferansa Pêşeroja Veberhênanan û hevdîtina bi Mîrê Tac ê Siûdî re gihîşt Riyadê
Serokê hukumeta veguhêz a Sûriyê Ehmed el-Şer’i roja Sêşemê gihîşt Riyadê da ku beşdarî çapa nehemîn a konferansa Înîsiyatîfa Veberhênana Pêşerojê bibe, ku di bin mijara “Kilîda geşedanê” de li Navenda Konferansa Navneteweyî ya Qiral Ebdulezîz tê lidarxistin.
Cîgirê Waliyê Riyadê, Mîrê Ebdûrehman bin Ebdulezîz, li Balafirgeha Navneteweyî ya Qiral Xalid pêşwaziya El-Şer’i kir. Biryar e ku El-Şer’i di kêliya konferansê de bi Mîrê Tac ê Siûdî Mihemed bin Selman re hevdîtin bike.
Rêberên zêdetirî 20 welatan beşdarî konferansê dibin, di nav wan de serokên Sûriyê, Iraq, Pakistan, Morîtanya, Bangladeş, Kuba û Qralê Urdunê, li gel Cîgirê Serokê Çînê. Nêzîkî 8,000 beşdar wezîr, berpirsên hikûmetê û nûnerên şîrket û sendiqeyên veberhênanê yên navneteweyî hene.
Civîneke maseya gilover a Sûrî-Siûdî jî bi beşdariya şandeyeke aborî ya asta bilind a Sûrî ku ji wezîrên aborî, darayî, enerjî û ragihandinê, rêveberê Desteya Veberhênanê ya Sûrî û nûnerên sektorên giştî û taybet pêk dihat, ji bo nîqaşkirina derfetên hevkariya aborî û xurtkirina hevkariyên di navbera her du welatan de, hate lidarxistin.
