Civîna di navbera Rêveberiya Xweser û Şanda Hikûmeta Veguhêz li Şamê Bi Dawî Bû
Şandeyek ji Rêveberiya Xweser a Demokratîk a Bakur û Rojhilatê Sûriyê û Hikûmeta Veguhêz ya Sûriyê îro li paytext Şamê civînek li dar xist. Li gorî çavkaniyên agahdar, di civînê de rêyên bicîhanîna bendên rêkeftina 10ê Adarê hatin nîqaşkirin û pêşketinên dawî yên meydanî û siyasî hatin nîqaşkirin.
Çavkaniyan diyar kirin ku di civîna ku çend demjimêran dom kir û ji çapemeniyê re girtî bû de, ji bilî nîqaşkirina pêşketinên dawî yên li bajarê Helebê, li ser mekanîzmayên bicîhanîna peymana ku di navbera rêveberiya Hêzên Sûriya Demokratîk û Hikûmeta Veguhêz de hatiye îmzekirin jî hat sekinandin.
Di civînê de Fermandarê Giştî yê Hêzên Sûriya Demokratîk, Mezlûm Ebdî, Hevseroka Beşa Têkiliyên Derve ya Rêveberiya Xweser, Îlham Ehmed, û Fermandara Yekîneyên Parastina Jin (YPJ), Rohilat Efrîn, ku nûnertiya Rêveberiya Xweser dikin, amade bûn. Hikûmeta Veguhêz ji Serokê wê, Ehmed El-Şer’i, û Wezîrê Derve Esed El-Şeybanî pêk dihat.
Ev civîn piştî civînek ku di 6ê Cotmehê de hate lidarxistin, bi beşdariya nûnerên Rêveberiya Xweser, Encûmena Sûriya Demokratîk, û Partiya Sûriya Pêşerojê, li gel Nûnerê Taybet ê Dewletên Yekbûyî yên Amerîka li Sûriyê, Tom Barrack, û Fermandarê Fermandariya Navendî ya Dewletên Yekbûyî, Amîral Brad Cooper, wekî beşek ji hewldanên hevpeymaniya navneteweyî ji bo piştgiriya aramiya li herêmê, pêk hat.
