Bexdad Û Şam Difkirin Ku Xeta Petrolê Ya Herî Kevin Di Rojhilata Navîn De Ji Nû Ve Vekin
Serokwezîrê Iraqê Mihemed Şîa El-Sudanî roja Sêşemê ragihand ku Iraq û Sûriyê li hev kirine ku şêwirmendek teknîkî ji bo nirxandina rewşa teknîkî ya borîya Kerkûk-Baniasê destnîşan bikin, û rê li ber nûjenkirin û ji nû ve aktîvkirina wê piştî zêdetirî du dehsalan bêçalakbûnê vekin.
El-Sudanî di axaftinên ji hêla medya Iraqê ve hatine weşandin de diyar kir ku “her du alî li hev kirin bi armanca vejandin û ji nû ve destpêkirina wê, nirxandinek berfireh a boriya di navbera Kerkûk û bendera Baniasê ya Sûriyê de bidomînin”, û destnîşan kir ku proje “ji bo her du welatan di xurtkirina şiyanên wan ên aborî û berfirehkirina dergehên hinardekirina petrola Iraqê de xwedî girîngiyek stratejîk e.”
Boriya Kerkûk-Baniasê, ku di salên 1950-an de hatiye çêkirin, yek ji damarên petrolê yên herî kevin û girîng ên Rojhilata Navîn e. Ew petrola xam a Iraqê ji zeviyên Kerkûk ber bi beravên Sûriyê yên li Derya Spî ve dibir, û Sûriyê dike deriyek sereke ji bo hinardekirina petrola Iraqê ber bi bazarên cîhanî ve. Boriya petrolê di sala 2003an de ji ber zirara di dema Şerê Iraqê de çêbûye, ji kar derket, berê du caran, di salên 1982 û 2000an de, ji ber nakokiyên siyasî yên di navbera Bexdad û Şamê de hatibû girtin.
Peymana nû piştî rêze serdanên hevbeş û şêwirmendiyên teknîkî yên di navbera rayedarên herdu welatan de tê, ku xwestekek hevpar ji bo vejandina hevkariya petrolê ya herêmî û bikaranîna pozîsyonên xwe yên stratejîk wekî korîdorên enerjiyê li herêmê nîşan dide.
